Mā ngā raho ka tū te ure : he tuhinga roa hai whakatutuki i ngā tikanga o te tohu paerua, i Te Pūtahi a Toi, i Te Kunenga ki Pūrehuroa, Te Papaioea, Aotearoa

Abstract

I ngā rā o nehe, i rere kau atu ngā kōrero mō te ai, mō ngā taihemahema, me te ao whakaipoipo i te ao Māori. Kitea ai ēnei kōrero i ngā tuhinga me ngā titonga a kui mā, a koro mā. Rangona ai i ngā waiata, i ngā haka, i ngā kōrero paki hoki. Kāore i tapu rawa ēnei momo kōrero pēnei i ēnei rā me ngā tau kua hori. Nō reira, he aha i pēnei ai? Ko te pūtake o te tuhinga roa nei he whakautu i tēnei pātai. Ka ruku atu ki ngā rangahau aronehe e mārama ai te tangata ki ngā āhuatanga maha i wero atu ai ki te oranga o tēnei reo. Kātahi ka whakatakotohia ētahi whakataukī, ētahi whakatauākī, ētahi kupu whakarite, ētahi pepeha, me ētahi kīwaha hoki e whakatauira ana i ngā kōrero o mua mō te ai, mō ngā taihemahema, me te ao whakaipoipo. I kohia ēnei kīanga mā te wherawhera i ētahi pukapuka e aro ana ki te whānuitanga o ngā kīanga me te ruku atu ki ngā puranga matihiko. Ko te hua nui i mahuki ake ko te whānuitanga o ngā kaupapa i kōrerotia e ngā tūpuna ki ēnei momo kīanga. Kāore i kōpiri noa iho ki ngā kōrero mō te ai me ngā taihemahema tonu, heoi anō, i tirohia ēnei wāhanga o te tinana hei waihanga kōrero. He tohu tēnei o te mutunga mai o te Māori o ēnei momo kōrero, o ēnei wāhanga o te tinana, me te ai hoki. Nō reira, kei ngā arero kaingākau ki te māori o te reo, ko tāku e manako nei ka horahia ēnei kōrero hei timotimo kai mā tātou!