He mahere ariā i te reo Māori ki te whare wānanga : he aha te anga whakamua? : he kaupapa i tuhia mō, Te Tohu Paerua, Master of Arts, Te Pūtahi-ā-Toi, Te Kunenga ki Pūrehuroa, Aotearoa

Abstract

Nō te ngahuru tau ki muri kua tautoko mai ngā whare wānanga o te motu i te āheinga ki te tuhi i ngā kātū mātātuhi me ngā tuhinga aromatawai ki te reo Māori. I te mea ko te reo Māori tētahi o ngā reo whai mana i Aotearoa. Ahakoa kua rahi ake te nama o ngā tuhinga reo Māori ki te whare wānanga he maha tonu ngā tūāhuatanga me ngā tukanga ka apoapo ai kia eke ngā tuhinga reo Māori ki te taumata e tika ana. Otirā, ko te kounga o ngā tuhinga he taurangi motukore. Ka tokona te pakirēhua, ka pēhea tō tātou reo rangatira e whakawhanake ai, e whakahaumako ai ki ngā wāhi pēnei i te whare wānanga? Kua kite tātou, i ngā tau kua hori, i te ngoikoretanga o ngā tikanga, ngā tukanga, me ngā rauemi kua whakatakotoria puta noa i ngā whare wānanga whānui hei āwhina i ngā tauira ki te tuhi ki te reo Māori. Nā tēnei āhuatanga ka toko ake te whakaaro mō tēnei kaupapa ki te whakatewhatewha i ngā tukanga me ngā āhuatanga o te wā nei ki te whakawhanake i te huarahi mā ngā tauira otirā, kia ngāwari ake ai ngā tukanga ki te tuhi i te reo Māori. Ko te aronga tuatahi he korahi i ngā mōhiohio o te wā nei, arā, he pānui i ētahi tuhinga roa ki te taumata o te tohu paerua e aro ana ki ngā kaupapa Māori, ki te whakamahere i ngā tini āhuatanga ka whakamahia te reo Māori. Whai muri i tēnei ka whakahaere i ētahi uiui ki te taha o ngā tauira tohu paerua me ngā pūkenga o te whare wānanga ki te wānanga i ngā tikanga e whakamahia ana te reo Māori i roto i ngā taumahi. Tāpiri atu ki tērā, ka āta tūhuraina ngā raraunga o ēnei hātepe ki te whakarato i tētahi arotohu o ngā mahi whaihua ina tuhi ai i te reo Māori ki te whare wānanga. Ko ngā kawatau Māori o te rangahau ka ārahi i aku mahi rangahau mō tēnei kaupapa.